Në Gjykatën Themelore në Prishtinë po zhvillohet procesi ndaj Besart Dedincës, i akuzuar për tentim vrasje në një incident të ndodhur më 27 gusht 2025 në Obiliq. I dëmtuari F.S. deklaroi se ngjarja kishte nisur për shkak të një borxhi prej 2 mijë e 300 eurosh për kokainë, ndërsa i akuzuari pretendon se konflikti kishte lidhje me një borxh për kumar dhe humbje të mëdha parash në lokalin e të dëmtuarit. Gjatë incidentit, Dedinca ka shtënë me armë zjarri në drejtim të F.S., i cili shpëtoi fatmirësisht, ndërsa një predhë goditi xhamin e një lokali pranë. Prokuroria ka propozuar administrimin e disa provave materiale dhe dëshmive, ndërsa gjykata ka refuzuar dëgjimin e dëshmitarit të propozuar nga i akuzuari, duke vazhduar shqyrtimin e çështjes.