Një ngjarje tragjike ndodhi në Vescovato të Kremonës, ku një 24-vjeçar shqiptar, Nurian Dalipaj, u vra me thikë në një konflikt që nisi për motive xhelozie. Autoritetet italiane njoftojnë se shkak i ngjarjes ishte një debat mes viktimës dhe Mattia Miraglia, 32 vjeç, i cili u arrestua dhe po hetohet për vrasje dhe tentativë vrasjeje. Pas një përleshjeje fillestare në një bar, situata u agravua kur viktima dhe dy vëllezërit e tij shkuan pranë banesës së autorit, ku Miraglia goditi me thikë Dalipajn, duke i shkaktuar vdekjen. Gjatë ngjarjes u plagos rëndë edhe vëllai 20-vjeçar i viktimës, i cili ndodhet në terapi intensive, ndërsa autori ka pësuar një dëmtim në dorë. Hetimet vazhdojnë për të zbardhur plotësisht rrethanat, ndërsa komuniteti lokal mbetet i tronditur nga kjo ngjarje e rëndë.