Ministria e Punëve të Brendshme e Maqedonisë ka zhvilluar një valë kontrollesh dhe aktivitete parandaluese në të gjithë vendin, duke fokusuar vëmendjen te drejtuesit e motoçikletave, mopedëve, triçikletave, katërçikletave dhe trotinetëve elektrikë. Gjatë 246 kontrolleve janë evidentuar 1.594 shkelje, ku më të shpeshtat ishin mosmbajtja e helmetës, drejtimi nën ndikimin e alkoolit dhe mungesa e lejes së drejtimit. Policia ka konfiskuar 41 motoçikleta dhe ka paralajmëruar me shkrim 10 drejtues trotinetësh elektrikë për shkelje të ndryshme, si përdorimi i pajisjeve elektronike gjatë vozitjes dhe lëvizja në zona të ndaluara. MPB apelon për respektimin e rregullave të trafikut për të rritur sigurinë rrugore dhe për të ulur numrin e aksidenteve.