Njësitë e Policisë së Kosovës në bashkëpunim me Prokurorinë Themelore në Pejë, Administratën Tatimore dhe Njësinë Anti-Kontrabandë të Doganës kanë kryer një kontroll të gjerë në biznesin “DAKI MOBILE” dhe në veturën e pronarit të tij, Dardan Krasniqi. Gjatë aksionit janë sekuestruar 160 mbushës Apple 20W, 13 telefona iPhone të modeleve të ndryshme, 13 telefona Samsung, një iPad dhe dy Apple Watch, me një vlerë totale rreth 30 mijë euro, të dyshuara si mallra të kontrabanduara dhe të pa deklaruara. Pronari është intervistuar dhe më pas është liruar me urdhër të prokurorit, ndërsa rasti po trajtohet në procedurë të rregullt për veprat penale të kontrabandës dhe shmangies nga tatimi. Hetimet janë ende në vazhdim, ndërsa autoritetet presin përllogaritjen përfundimtare të vlerës së mallrave dhe detyrimeve doganore të shmangura.