Policia e Kosovës ka kryer një kontroll në shtëpinë e një personi 42-vjeçar në fshatin Talinovc të Jerlive, Ferizaj, pas informacioneve për posedim të paligjshëm të armëve. Gjatë kontrollit janë sekuestruar një armë me gaz, 13 fishekë të armës me gaz, dy fishekë të armës së shkurtër dhe një fishek i armës së gjatë. I dyshuari, M.M., ka pranuar posedimin e armës në banesën e tij, ndërsa për rastin është njoftuar prokurori i shtetit dhe është iniciuar procedura penale për mbajtje të paautorizuar të armëve. Personi është liruar në procedurë të rregullt hetimore, ndërsa hetimet vazhdojnë nga njësitet policore dhe forenzike.