Një muaj pas shpalljes së epidemisë në Gostivar, e lidhur me ndotjen e ujit të pijshëm, Instituti i Shëndetit Publik (ISHP) ka kërkuar verifikimin e kualifikimit të stafit të ndërmarrjes publike “Komunalec” dhe ka dhënë një sërë rekomandimesh për përmirësimin e sigurisë së furnizimit me ujë. ISHP thekson nevojën për trajnime të vazhdueshme të personelit përgjegjës, monitorim të rregullt të nivelit të klorit dhe kontrolle më të shpeshta të rrjetit të ujësjellësit, duke përfshirë edhe vendosjen e sistemeve automatike për matje dhe alarm. Po ashtu, rekomandohet rritja e inspektimeve në terren, kontrolli i lidhjeve të paligjshme dhe vlerësimi teknik i stacionit të filtrimit, me qëllim rikthimin e tij në funksion në përputhje me standardet. Këto masa synojnë të parandalojnë përsëritjen e krizave dhe të sigurojnë furnizim të qëndrueshëm dhe të sigurt me ujë për qytetarët e Gostivarit.