Policia e Lezhës ka vijuar kontrollet intensive në zonën turistike të Shëngjinit për të garantuar respektimin e normave të lejuara të zhurmës gjatë sezonit veror. Me pajisje matëse të nivelit të zhurmës, janë monitoruar ambiente të hapura dhe të mbyllura, ku u konstatua se të gjitha subjektet kanë respektuar kufijtë ligjorë pa asnjë shkelje. Gjithashtu, është kontrolluar edhe respektimi i orarit të lejuar për aktivitetet muzikore në ambiente të hapura, nga ora 11:00 deri në 24:00. Policia njofton se do të vazhdojë monitorimin gjatë gjithë sezonit dhe fton qytetarët të denoncojnë çdo shkelje për një reagim të menjëhershëm.