Agjencia e Metrologjisë së Kosovës në bashkëpunim me Inspektoratin Qendror të Mbikëqyrjes së Tregut po vijojnë aksionin e inspektimit të operatorëve ekonomikë që prodhojnë dhe shesin bukë, me fokus kontrollin e peshës së produkteve dhe verifikimin e peshoreve. Ky aksion, i nisur më 25 gusht 2026 dhe i zhvilluar fillimisht në rajonin e Prishtinës dhe Fushë-Kosovës, ka zgjeruar aktivitetin edhe më 1 dhe 3 shtator, duke përfshirë tashmë edhe komuna të tjera. Për shkak të interesimit të shtuar, 60 furrtarë kanë kërkuar verifikimin e peshoreve të tyre, duke treguar angazhimin për respektimin e kërkesave ligjore dhe mbrojtjen e konsumatorëve. AMK dhe IQMT bëjnë thirrje për kujdes dhe përmbushje të standardeve, me qëllim garantimin e matjeve të sakta dhe funksionimin e drejtë të tregut.