Njësia K9 e Policisë së Kosovës ka kryer kontrolle të detajuara në hotelin “Swiss Diamond” në Prishtinë, ku është akomoduar Kombëtarja e Turqisë, si pjesë e masave të shtuara të sigurisë para ndeshjes së rëndësishme. Kontrolli përfshiu parkingun dhe ambientet e brendshme të hotelit, ndërsa forca të shumta policore janë vendosur përreth për të garantuar sigurinë e lojtarëve dhe stafit. Dy autobusë VIP nga Turqia janë përdorur për transportin e ekipit nga aeroporti në hotel dhe anasjelltas. Lojtarët turq janë njohur me fushën e stadiumit “Fadil Vokrri”, por nuk kanë zhvilluar stërvitje në Prishtinë, pasi e kishin realizuar atë pak para nisjes për në Kosovë. Ndeshja finale e “play-off”-it zhvillohet sonte në orën 20:45, ku fituesi siguron biletën për në Kampionatin Botëror.