Dogana e Kosovës ka zbuluar mbi 54 mijë euro të padeklaruara gjatë një kontrolli të kryer në pikëkalimin kufitar të Kullës. Gjatë kontrollit të një automjeti të përzgjedhur në vijën e dytë, zyrtarët doganorë kanë gjetur para të gatshme në euro dhe valuta të tjera të huaja, të cilat nuk ishin deklaruar sipas ligjit. Nga kjo shumë, Dogana ka konfiskuar 25 për qind, që arrin mbi 13 mijë e 500 euro, ndërsa pjesa tjetër do të trajtohet sipas procedurave ligjore në fuqi. Institucioni ka rikujtuar udhëtarët për detyrimin ligjor të deklarimit të mjeteve monetare dhe ka paralajmëruar vazhdimin e kontrolleve për parandalimin e veprimtarive të kundërligjshme.