Ministria e Bujqësisë, Pylltarisë dhe Zhvillimit Rural së bashku me Agjencinë e Ushqimit dhe Veterinarisë (AUV) të Kosovës kanë urdhëruar tërheqjen e menjëhershme nga tregu të ëmbëlsirave xhelatinoze "Hello Kitty Apfel Koniac Gelee", të prodhuara nga Sanrio Co., LTD. në Tokio, Japoni dhe eksportuar nga Holanda. Ky vendim erdhi pas njoftimit të marrë përmes Sistemit të Alarmimit të Shpejtë për Ushqim dhe Ushqim për Kafshë (RASFF), që paralajmëronte për rrezikun e mundshëm shëndetësor nga konsumimi i këtyre karameleve. AUV ka kërkuar nga bizneset që kanë në shitje këtë produkt me datën e skadimit 11/06/2026 dhe peshë 150 gram të ndalojnë menjëherë shitjen dhe të kthejnë produktet në depot nga janë furnizuar. Konsumatorët janë këshilluar të mos përdorin këto ëmbëlsira, ndërsa institucionet përgjegjëse kanë theksuar përkushtimin e tyre në monitorimin dhe kontrollin e tregut për garantimin e sigurisë ushqimore dhe mbrojtjen e shëndetit publik në Kosovë.