Kohët e fundit në Kosovë janë regjistruar disa alarme për mjete shpërthyese, të cilat deri tani kanë rezultuar të rreme, përfshirë një rast të fundit në Stacionin e Autobusëve në Prishtinë. Megjithatë, ekspertët e sigurisë theksojnë se këto alarme nuk duhet të neglizhohen, pasi vetëm një rast i vërtetë mund të ketë pasoja fatale për jetën e njerëzve. Sipas njohësit të sigurisë Shkelzen Sopjani, këto sinjale alarmuese vijnë nga jashtë territorit të Kosovës, nga vende që kanë interesa armiqësore ndaj vendit. Ai paralajmëron se edhe në të ardhmen do të ketë alarme të ngjashme dhe se mënyra e reagimit duhet të rishikohet, por asnjëherë nuk duhet të injorohen për të shmangur dështimin e strukturave të sigurisë.