Ministria e Punëve të Brendshme ka paralajmëruar qytetarët për një valë mesazhesh mashtruese që po dërgohen nga një numër telefoni nga Filipinet, ku pretendohen shkelje të rregullave të komunikacionit dhe kërkohet pagesë e menjëhershme. Mesazhet përmbajnë një link që çon në një faqe interneti të rreme, e cila imiton faqen zyrtare të Ministrisë së Brendshme dhe kërkon futjen e të dhënave personale dhe të kartës së pagesës. Pas futjes së numrit të targës së automjetit, përdoruesit informohen për një shkelje të regjistruar dhe u kërkohet të paguajnë 1500 denarë për të shmangur pasoja. MPB apelon që qytetarët të jenë të kujdesshëm, të mos besojnë mesazhet e tilla dhe të mos japin asnjë informacion personal për të shmangur keqpërdorimet.