Ministria e Punëve të Brendshme ka paralajmëruar qytetarët për sulme të reja "phishing" që po kryhen përmes mesazheve të rreme SMS, emaileve dhe rrjeteve sociale, të cilat pretendojnë se vijnë nga sistemi "Safe City". Këto mesazhe përmbajnë linke të rreme që synojnë të ridrejtojnë përdoruesit për të bërë pagesa të paautorizuara për shkelje trafiku. MPB bën thirrje që qytetarët të jenë të kujdesshëm, të mos hapin linke të dyshimta, të mos ndajnë të dhëna personale dhe të përdorin autentifikimin me dy faktorë për mbrojtje shtesë. Sektori i Krimit Kibernetik po vazhdon hetimet për të zbuluar dhe ndëshkuar autorët e këtyre mashtrimeve, ndërsa njoftimet zyrtare për shkelje duhet të vijnë vetëm nga dërguesi "MVR-SC" me format të caktuar të linkut dhe përmbajtjes.