Sot shënohen 28 vjet nga rënia heroike e komandantit Agim Bajrami dhe bashkëluftëtarëve të tij, Besnik Begunca dhe Xheladin Kurtaj, ngjarje kjo që shënon edhe Ditën e Dëshmorëve të Brigadës 162 “Agim Bajrami” të Kaçanikut. Në nderim të tyre, Komuna e Kaçanikut, nën drejtimin e kryetarit Sabedin Vishi dhe në bashkëpunim me Organizatën e Veteranëve të Luftës së UÇK-së, organizon aktivitete përkujtimore. Brigada 162, e themeluar në mars të vitit 1998 dhe e udhëhequr nga Agim Bajrami, ka dhënë 95 dëshmorë në luftën për liri, duke përfshirë dy komandantë dhe veprimtarë të shquar të çështjes kombëtare. Ky përvjetor rikujton sakrificën e madhe dhe rrugën e gjatë të luftës çlirimtare në Kaçanik, që ka lënë gjurmë të thella në historinë e Kosovës.