Në kuadër të 30 Gushtit, Ditës Ndërkombëtare të Viktimave të Zhdukjeve me Forcë, institucionet e Kosovës organizuan një vizitë solemne në varrin masiv në Kalludër të Zubin Potokut. Kjo vizitë u realizua nga Policia e Kosovës përmes Drejtorisë për Hetimin e Krimeve të Luftës, Komisioni Qeveritar për Persona të Zhdukur dhe Instituti për Mjekësi Ligjore, në bashkëpunim me shoqatat e familjeve të personave të zhdukur. Aktiviteti shërben si një shenjë respekti dhe nderimi për viktimat, si dhe mbështetje për familjet që prej më shumë se dy dekadash kërkojnë të vërtetën dhe fatin e të afërmve të tyre. Ky bashkëpunim ndërinstitucional dhe partneriteti me familjet e viktimave theksojnë përkushtimin e vazhdueshëm për zbardhjen e fatit të personave të zhdukur.