Një ngjarje e rëndë ka ndodhur në dalje të fshatit Kutalli, në bashkinë Dimal, ku 45-vjeçari Zamir Skënderi, i shoqëruar nga policia për shkak të një konflikti në Prokurorinë e Fierit, ka rrëmbyer armën e shërbimit të një efektivi dhe e ka plagosur në kofshë. Incidenti ndodhi gjatë kthimit në automjetin e policisë, ku Skënderi ishte ulur në sediljen e pasme së bashku me efektivin 20-vjeçar Arsen Toska. Pas plagosjes, 45-vjeçari tentoi të largohej, por u arrestua nga dy efektivët e tjerë që ndodheshin në makinë. Polici i plagosur u transportua fillimisht në Spitalin Rajonal Berat dhe më pas në Spitalin e Traumës në Tiranë për trajtim të specializuar, ndërsa në vendngjarje po kryhen hetime nga forcat e policisë dhe inspektorët e Agjencisë së Mbikëqyrjes Policore.