Inspektorati Policor i Kosovës ka zbuluar kushte të papranueshme higjienike në Qendrën e Ndalimit në Rahovec, ku të ndaluarit mbahen kryesisht për 48 orë. Në dhomat e këtij objekti janë gjetur mbetje ushqimore, tualete dhe lavamanë të papastra, si dhe dyshekë dhe jastëkë të njollosur pa çarçafë për mbulim. Përveç mungesës së pastërtisë, në hapësirat e qendrës janë hasur mjete të forta dhe potencialisht të rrezikshme si tulla betoni, lopatë dhe kabllo, që paraqesin kërcënim serioz për sigurinë e të ndaluarve dhe personelit.