Shoqata për të Drejtat e Pacientëve në Kosovë (PRAK) ka reaguar ashpër lidhur me raportimet për kushtet e vështira në Klinikën e Pediatrisë të QKUK-së, duke kërkuar një hetim transparent dhe masa të menjëhershme për përmirësimin e tyre. PRAK shpreh shqetësim për mungesën e kushteve higjieno-sanitare elementare, kontrollin e infeksioneve dhe mungesën e mjeteve bazike, si dhe për komunikimin jo të duhur me familjarët e pacientëve. Shoqata thekson se çdo pacient dhe familjar duhet të ketë të drejtë të raportojë parregullsitë pa u përballur me presion apo intimidim, duke kërkuar mbrojtje të plotë për ta. Në reagim theksohet gjithashtu se kritikat nuk janë sulm ndaj profesionistëve shëndetësorë, por një thirrje për trajtimin serioz të problemeve institucionale dhe sistemore në shëndetësi.