Policia e Kosovës ka konfirmuar largimin nga puna të togerit Arben Visoqi, i njohur si dhëndri i ish-presidentit Hashim Thaçi, pas 26 vitesh shërbim. Sipas Policisë, ndaj Visoqit janë iniciuar 15 raste disiplinore gjatë gjithë karrierës së tij, përfshirë tri raste që lidhen me shkrime dhe komente në rrjete sociale, ku janë shqiptuar gjithsej gjashtë masa disiplinore. Vendimi për ndërprerjen e marrëdhënies së punës u mor pasi Visoqi vazhdoi me shkelje të njëjta, të cilat përbëjnë sjellje të rëndë diskredituese, mosbindje dhe shkelje të autorizimit, duke dëmtuar imazhin e Policisë së Kosovës. Ndërsa Visoqi pretendon se largimi i tij është politik dhe i shkaktuar nga presionet e Vetëvendosjes, Policia thekson se të gjitha rastet janë trajtuar në mënyrë profesionale dhe të pavarur, duke i dhënë të drejtë palëve të ankohen në gjykatë.