Kompania Rajonale e Ujësjellësit “Prishtina” ka zbuluar dhe shkyçur gjatë ditës së sotme disa lidhje ilegale të ujit në lagjen Veternik dhe në disa lokale në sheshin e Prishtinës. Në veçanti, në sheshin “Xhorxh Bush” janë evidentuar më shumë lidhje ilegale sesa legale, një situatë që kompania e konsideron të papranueshme. KRU “Prishtina” ka njoftuar se lidhjet e paligjshme janë shkyçur nga rrjeti dhe rastet do të procedohen më tej në institucionet kompetente, duke përfshirë Prokurorinë. Ky aksion synon të mbrojë funksionimin e sistemit të furnizimit me ujë dhe të mbrojë konsumatorët që respektojnë rregullat.