Janë konfirmuar raste të lisë së dhenve dhe dhive në komunat Ferizaj, Kaçanik, Shtërpcë dhe Viti, duke ngritur shqetësime për përhapjen e sëmundjes në fermat blegtorale të Kosovës. Agjencia e Ushqimit dhe Veterinarisë (AUV) ka bërë thirrje të forta për fermerët që të zbatojnë me përpikëri masat e biosigurisë, të mos lëvizin kafshët pa autorizim dhe të raportojnë menjëherë çdo shenjë të dyshimtë të sëmundjes. AUV rekomandon izolimin e kafshëve të sapoblera, pastrimin dhe dezinfektimin e rregullt të objekteve, si dhe kufizimin e hyrjes së personave dhe automjeteve të paautorizuara në fermë. Megjithëse sëmundja nuk transmetohet te njerëzit, ajo paraqet një kërcënim serioz ekonomik për fermerët dhe sektorin blegtoral, ndaj bashkëpunimi i tyre është thelbësor për parandalimin e përhapjes së mëtejshme.