Në fshatin Drenije të Patosit, Fier, zjarri i përhapur gjatë natës ka zgjeruar vatrën në thellësi të masivit pyjor drejt Gjinoqarës dhe Ngracies. Në terren janë angazhuar 68 forca, përfshirë zjarrfikës, efektivë të MZSH-së, forca të bashkisë dhe trupa ushtarake, të cilët po përballen me kushte të vështira për shkak të terrenit dhe intensitetit të flakëve. Operacioni fokusohet në izolimin dhe frenimin e përhapjes së zjarrit, por perimetri i gjerë dhe natyra e terrenit po e komplikojnë ndjeshëm punën e tyre. Lufta me flakët vazhdon pa ndërprerje, ndërsa forcat në terren përpiqen të shmangin përkeqësimin e situatës.