Zjarret masive që kanë përfshirë Ulqinin dhe Herceg Novin në Mal të Zi vazhdojnë të jenë një sfidë e madhe për zjarrfikësit, të cilët edhe këtë mëngjes po luftojnë për t’i vënë nën kontroll. Pavarësisht se gjatë natës era është dobësuar, ekziston frika se ajo mund të përforcohet sërish, duke vështirësuar situatën në terren. Në operacionin e fikjes marrin pjesë jo vetëm ekipet lokale, por edhe ato nga qytete të tjera si Tivari, Berane, Bijello Polja, si dhe forcat e Ushtrisë së Malit të Zi, duke përdorur helikopterë dhe aeroplanë. Situata mbetet e ndërlikuar, sidomos në zonat malore dhe të vështira të Herceg Novit, ku janë evakuuar familje për shkak të rrezikut nga zjarri, ndërsa në Ulqin situata ka shkaktuar ndërprerje të furnizimit me ujë.