Një zjarr i fuqishëm ka përfshirë Malin e Krujës, ku mbi 280 efektivë të strukturave të emergjencave civile, Forcave të Armatosura dhe Mbrojtjes nga Zjarri janë angazhuar në një operacion të gjerë për shuarjen e flakëve. Operacioni po zhvillohet intensivisht gjatë gjithë natës dhe ditës, me ndërhyrje nga toka dhe ajri, duke përfshirë 21 mjete zjarrfikëse, tre helikopterë, dronin Bayraktar TB2 dhe dy dronë me kamera termike të AKMC-së. Autoritetet kanë urdhëruar evakuimin e banorëve në zonën Barabit-Lluban për shkak të përhapjes së zjarrit, ndërsa Qendra Operacionale e Lëvizshme e AKMC-së është dislokuar në terren për koordinimin dhe monitorimin e situatës. Prioritet mbetet mbrojtja e jetës së qytetarëve, pronave dhe mjedisit, ndërsa pritet mbërritja e forcave dhe mjeteve shtesë nga bashkitë e tjera për të përballuar situatën.