Kompania Rajonale e Ujësjellësit “Hidrodrini” në Istog ka zbuluar dhjetë raste të reja të keqpërdorimit të ujit të pijshëm gjatë një aksioni të inspektorëve rajonalë, në një kohë kur vendi po përballet me thatësirë dhe mungesë të ujit. Personat përgjegjës janë proceduar në Prokurorinë e Shtetit, ndërsa aksionet do të vazhdojnë 24 orë në ditë, shtatë ditë në javë, në të gjitha komunat e mbulueshmërisë së kompanisë. Në Zhegër, KRU Hidromorava ka konstatuar përdorim të ujit për larje rrugësh, automjetesh dhe ujitje, duke theksuar se çdo përdorim jashtë nevojave bazike dhe lidhjet ilegale janë shkelje që dëmtojnë furnizimin për konsumatorët e tjerë. Kompania ka paralajmëruar masa të rrepta, përfshirë shkyçje pa paralajmërim, dhe ka bërë apel për përdorim racional dhe bashkëpunim nga qytetarët për të siguruar furnizim të qëndrueshëm.