Gjatë 12 orëve të fundit në Shqipëri janë regjistruar 23 vatra zjarri, nga të cilat 8 mbeten ende aktive në zona të ndryshme si Dajt, Krujë, dhe mali i Nemërçkës. Për të përballuar situatën, janë angazhuar 26 automjete zjarrfikëse, 310 forca operacionale, 103 efektivë të Forcave të Armatosura, si dhe tre helikopterë dhe dy avionë “Air Tractor”. Ndërhyrjet ajrore janë ndërprerë gjatë mbrëmjes, por operacionet në terren vazhdojnë intensivisht, veçanërisht në Gurë-Lurë të Dibrës ku po mbrohen banesat pranë vatrave aktive. Autoritetet theksojnë se nuk ka rrezik për zonat e banuara dhe vazhdojnë koordinimin për neutralizimin e plotë të zjarreve.