Policia e Malit të Zi ka kryer një bastisje në banesën dhe pronat e biznesmenit Aco Gjukanoviç, vëllait të ish-kryeministrit dhe ish-presidentit Milo Gjukanoviç, në qendër të Podgoricës. Operacioni u zhvillua në rrugën “Vuk Karagjiq”, ku ndodhet edhe një degë e bankës Prva Banka në pronësi të Aco Gjukanoviçit, dhe përfshiu bllokimin e disa pjesëve të rrugës dhe angazhimin e njësive speciale. Bastisja po kryhet në kuadër të një hetimi më të gjerë financiar, nën drejtimin e Prokurorisë Themelore të Shtetit në Podgoricë. Raportimet tregojnë se Aco Gjukanoviç ishte zhvendosur në Luksemburg pas zgjedhjeve të vitit 2020, ku kishte nisur projekte të reja biznesi.