Inspektorati Qendror i Mbikëqyrjes së Tregut (IQMT) ka vijuar kontrollet në marketet kryesore të Kosovës, duke përfshirë Prishtinën, Pejën, Gjilanin, Mitrovicën, Gjakovën dhe Fushë Kosovën, për të verifikuar respektimin e udhëzimeve lidhur me produktet e qumështit. Këto kontrolle janë fokusuar në ndalimin e shitjes së produkteve të dyshimta apo të papërshtatshme për konsum, pas raportimeve të Agjencisë së Ushqimit dhe Veterinarisë (AUV). Rezultatet tregojnë se marketet po zbatojnë rregullat dhe po largojnë nga shitja produktet që nuk plotësojnë standardet e sigurisë ushqimore. IQMT nxit konsumatorët të raportojnë çdo parregullsi përmes platformës Viber në numrin e dedikuar për ankesa, duke theksuar rolin e tyre të rëndësishëm në mbrojtjen e shëndetit publik.