Policia e Lezhës arrestoi tre persona, dy vëllezër dhe kushëririn e tyre, pasi dyshohet se morën me forcë një 28-vjeçar dhe e dhunuan për shkak të një konflikti lidhur me pagesën e qirasë për dy automjete. Ngjarja nisi pas kallëzimit të babait të 28-vjeçarit, i cili raportoi se djali i tij ishte marrë me forcë dhe transportuar me automjet në një karburant në fshatin Derven. Të arrestuarit, administratorë të subjektit ku ishin marrë automjetet me qira, e transportuan viktimën në një karburant tjetër në fshatin Shënkoll, ku e dhunuan dhe më pas e lanë në rrugë. 28-vjeçari u dërgua në spital për ndihmë mjekësore dhe më pas u lirua, ndërsa materiali procedurial iu referua Prokurorisë për veprime të mëtejshme për veprat penale “Heqja e paligjshme e lirisë”, “Vetëgjyqësia” dhe “Dëmtime të tjera me dashje”.