Pesë shtetas shqiptarë janë arrestuar në Mbretërinë e Bashkuar për përfshirje në një skemë mashtrimi me martesa të rreme, që synonte marrjen e lejeve të qëndrimit përmes dokumenteve të falsifikuara. Ata përdornin certifikata martese të rreme, të pretenduara si të lëshuara në Qipro, për të provuar lidhje me shtetas të Bashkimit Evropian dhe përfitimin e statusit në kuadër të Skemës së Vendosjes së BE-së pas Brexit-it. Njëri prej të arrestuarve ka pranuar fajësinë, ndërsa të tjerët janë në pritje të gjykimit, me akuza që përfshijnë mashtrim, shkelje të ligjit të emigracionit dhe posedim kanabisi me qëllim furnizimi. Autoritetet britanike kanë bërë thirrje për respektimin e procesit gjyqësor dhe shmangien e komenteve që mund të ndikojnë në vendimin e gjykatës.