Gjykata Themelore në Prishtinë ka caktuar një muaj paraburgim ndaj të pandehurit me inicialet S.LL., i dyshuar për veprat penale të kanosjes dhe nxitjes së përçarjes dhe mosdurimit. Ky vendim u mor pas kërkesës së Prokurorisë Speciale të Republikës së Kosovës dhe mbajtjes së seancës dëgjimore, duke u bazuar në rrezikun real që i pandehuri mund të arratisej për të shmangur përgjegjësinë penale. Gjykata theksoi se paraburgimi është masa më adekuate në këtë fazë për të siguruar praninë e tij dhe për të garantuar zhvillimin e rregullt të procedurës penale. Palët që nuk janë të kënaqura me këtë vendim kanë të drejtë të ankohen në Gjykatën e Apelit përmes Gjykatës Themelore në Prishtinë.