Gjykata Themelore në Prishtinë ka caktuar masën e paraburgimit prej 30 ditësh ndaj A.D., një ish-pjesëtar i Ministrisë së Punëve të Brendshme në Ferizaj dhe polic trafiku në regjionin e Kaçanikut, i dyshuar për krime lufte kundër popullsisë civile gjatë vitit 1999. Ai akuzohet për përfshirje në një aksion policor-ushtarak më 9 mars 1999, në fshatin Ivajë dhe zonat përreth Kaçanikut, ku banorët u detyruan të largohen nga shtëpitë e tyre, të cilat më pas u dogjën dhe u shkatërruan. Gjatë këtij aksioni, 91 meshkuj u ndanë nga rreth 400 persona të grumbulluar dhe u dërguan në stacionin policor në Kaçanik, ku 13 prej tyre u ndaluan, rrahën dhe torturuan në mënyrë çnjerëzore nga i dyshuari. Prokuroria Speciale e Republikës së Kosovës ka theksuar se veprimet e A.D. përbëjnë krim lufte dhe kërkoi paraburgimin e tij, i cili u miratua nga gjykata.