Gjykata Themelore në Prishtinë ka caktuar një muaj paraburgim ndaj të dyshuarit A.H., i akuzuar për pjesëmarrje në grup kriminal të organizuar, shitblerje të narkotikëve dhe shpëlarje parash. Vendimi u mor pas kërkesës së Prokurorisë Speciale të Republikës së Kosovës, e cila argumentoi se lirimi i tij mund të pengonte hetimet dhe të ndikonte në dëshmitarë apo prova. Gjyqtarja e procedurës paraprake vlerësoi se masa e paraburgimit është e nevojshme për të garantuar rrjedhën normale të procesit penal. Palët që nuk janë të kënaqura me këtë vendim kanë të drejtë të ankohen në Gjykatën e Apelit përmes Gjykatës Themelore në Prishtinë.