Në Shqipëri kanë hyrë në fuqi ndryshimet e reja në Kodin Rrugor që ashpërsojnë ndëshkimet për shkelësit e rregullave të trafikut dhe synojnë rritjen e sigurisë rrugore. Një nga masat më të forta është heqja përjetë e patentës për shoferët që kapen përsëri duke drejtuar nën efektin e alkoolit mbi 0.5 gram për litër gjak, pa mundësi rikthimi përmes autoshkollës. Po ashtu, ndëshkimet për drejtimin pa patentë janë rritur, duke përfshirë ndalimin për një vit të të rriturve për t’u pajisur me leje drejtimi dhe shtyrjen e marrjes së patentës për të miturit me dy vite pas mbushjes së 18 vjeç. Shoferët e rinj për dy vitet e para pas marrjes së patentës nuk lejohen të kenë asnjë nivel alkooli në gjak dhe kanë kufizime të shpejtësisë në autostradë dhe rrugë jashtë qendrave të banuara.