Në prag të sezonit veror dhe rritjes së rrezikut nga zjarret, Ministria e Punëve të Brendshme në Shqipëri ka hartuar një plan të detajuar masash për parandalimin e tyre dhe përforcimin e kapaciteteve operacionale. Në një takim koordinues me drejtuesit e strukturave zjarrfikëse nga 61 bashkitë, u theksua rëndësia e gatishmërisë dhe bashkëpunimit mes institucioneve përgjegjëse, si dhe kontrolli i rreptë në hotele, resorte dhe zona me risk të lartë. Ministri Besfort Lamallari paralajmëroi zero tolerancë ndaj zjarrvënies së qëllimshme, duke njoftuar se dënimet për zjarrvënësit mund të arrijnë deri në 30 vite burg. Përveç ashpërsimit të masave penale, është rritur ndjeshëm edhe mbështetja financiare dhe teknike për Shërbimin e Mbrojtjes nga Zjarri dhe Shpëtimit, me planifikimin e blerjes së mjeteve të reja dhe ndërtimin e stacioneve të reja zjarrfikëse në disa zona të vendit.