Në fshatin Kalludër i Vogël të komunës së Zubin Potokut janë gjetur mbetje mortore që janë konfirmuar si me origjinë njerëzore dhe me interes mjeko-ligjor, njoftoi Instituti i Mjekësisë Ligjore. Ekipet e specializuara, përfshirë Komisionin Qeveritar për Persona të Zhdukur dhe Sektorin për Hetimin e Krimeve të Luftës, po punojnë në terren për të bërë ekzaminimet dhe gërmimet e nevojshme, duke u përballur me vështirësi për shkak të terrenit malor. Udhëheqësi i Komisionit Qeveritar për Persona të Zhdukur, Kushtrim Gara, theksoi se është ende herët për detaje të mëtejshme dhe se çdo informacion do t’u komunikohet fillimisht familjarëve të personave të zhdukur. Dyshohet se mbetjet mund të jenë të grupit të njohur si “intelektualët nga Mitrovica”, të zhdukur në prill të vitit 1999, ndërsa dy persona janë arrestuar në lidhje me këtë rast dhe hetimet vazhdojnë.