Ekipet e K.R.U. “Gjakova” Sh.A. kanë ndërhyrë për të zhbllokuar tri puse kanalizimi në rrugën “Ali Pashë Tepelena” në Gjakovë, ku janë gjetur sasi të mëdha mbeturinash të hedhura në mënyrë të papërgjegjshme. Në puset janë larguar kartonë, gurë, shishe qelqi, plastikë, shkopinj dhe hekurë me gjatësi deri në 1.5 metra, ndërsa punëtorët kanë punuar orë të tëra për të rikthyer funksionimin normal të rrjetit. KRU “Gjakova” paralajmëron se këto veprime shkaktojnë dëme serioze në sistemin e ujërave të ndotura dhe kolektorëve, duke rrezikuar funksionimin e rrjetit dhe duke krijuar pasoja për qytetarët. Kompania thekson se kjo është hera e dytë brenda një viti që ndodhin raste të tilla në këtë lokacion dhe paralajmëron masa ligjore ndaj personave përgjegjës nëse situata përsëritet.