Mbi 2 mijë pacientë në Klinikën e Kardiologjisë në Qendrën Klinike Universitare të Kosovës janë në pritje për stentim për shkak të mungesës së stentave. Familjarët e pacientëve alarmojnë se kjo situatë po rrezikon jetën e të sëmurëve, pasi trajtimi në sektorin privat është jashtë mundësive financiare për shumicën e tyre. Drejtori i Klinikës së Kardiologjisë, Faik Shatri, konfirmon mungesën e disa numrave të stentave, por thekson se situata është nën kontroll dhe asnjë pacient nuk është i rrezikuar. Nga Drejtoria e QKUK-së dhe Shërbimi Spitalor dhe Klinik Universitar i Kosovës bëjnë me dije se furnizimi me stenta pritet të realizohet shumë shpejt, pasi kontratat për materialet janë nënshkruar dhe kërkesat për furnizim janë bërë.