Mbi 60 zyrtarë publikë në vend janë gjobitur nga Agjencia për Parandalimin e Korrupsionit për mosdeklarim të pasurisë brenda afateve ligjore, me masa ndëshkimore që arrijnë deri në 500 euro. Gjysma e këtyre gjobave janë shlyer, ndërsa pjesa tjetër është në procedurë ankesash. Përveç gjobave administrative, Agjencia ka dërguar dhjetëra kallëzime penale në Prokurori për dyshime rreth fshehjes ose deklarimit të rremë të pasurisë, duke e çuar çështjen në fazën e shqyrtimit penal. Drejtori i Agjencisë, Yll Buleshkaj, thekson se vonesat në deklarime lidhen edhe me ndryshimet në pushtetin lokal dhe se procesi është një obligim ligjor që zyrtarët duhet ta respektojnë.