Në Mitrovicën e Jugut u organizua një aksion i madh pastrimi ku morën pjesë mbi 700 vullnetarë nga kategori të ndryshme të shoqërisë, përfshirë nxënës, studentë, profesorë, mjekë, artistë, sportistë dhe shumë profesionistë të tjerë. Gjatë këtij aksioni u pastruan dhjetëra hapësira publike, përfshirë 8 deponi ilegale në zonat e Shalë të Bajgorës dhe Vaganicës, si dhe objekte shkollore, shëndetësore, sportive dhe kulturore. Aksioni përfshiu gjithashtu pastrimin e Parkut të qytetit, shëtitores Kej, rrugëve kryesore, varrezave të Shipolit dhe lagjeve të ndryshme, duke përforcuar ndjenjën e bashkëpunimit qytetar. Kryetari i Mitrovicës së Jugut, Faton Peci, falënderoi të gjithë pjesëmarrësit dhe theksoi se kjo iniciativë është një shembull i bashkimit të komunitetit në punë të mira për të ardhmen e qytetit.