Në Kosovë, rastet me fruth kanë shënuar rritje gjatë pesë muajve të fundit, me 151 raste të konfirmuara, ku mbi 95% janë te personat e pavaksinuar. Për të parandaluar përhapjen e sëmundjes, gjatë tetë muajve të këtij viti janë vaksinuar mbi 8 mijë fëmijë në grupmosha të ndryshme, duke përfshirë fëmijët nga 1 deri në 7 vjeç dhe nxënësit e klasës së parë. Shefja e vaksinimit në Qendrën Kryesore të Mjekësisë Familjare thekson se vaksinimi është mënyra më efektive dhe më e sigurt për parandalimin e fruthit dhe komplikimeve serioze që mund të shkaktojë kjo sëmundje ngjitëse. Autoritetet shëndetësore bëjnë apel që prindërit të vaksinojnë fëmijët e tyre dhe të mos bien pre e dezinformatave, duke theksuar se efektet anësore të vaksinës janë të lehta dhe kalojnë shpejt.