Avokati i ish-presidentit Hashim Thaçi, Luka Misetiq, ka kërkuar nga Gjykata Speciale që ta shpallë të pafajshëm dhe ta lirojë menjëherë klientin e tij, duke argumentuar se jeta dhe karriera e Thaçit janë kushtuar lirisë dhe pavarësisë së Kosovës. Në dosjen përfundimtare gjyqësore, mbrojtja thekson se Prokuroria e Hagës po përpiqet të rishkruajë historinë duke e paraqitur Ushtrinë Çlirimtare të Kosovës si një Ndërmarrje Kriminale të Përbashkët, një pretendim që sipas tyre nuk mbështetet nga faktet. Mbrojtja akuzon Prokurorinë se ka bazuar rastin në deklarata të kundërshtarëve politikë të Thaçit, të cilët kanë motive për ta diskredituar atë me dëshmi të rreme. Gjithashtu, ata theksojnë se Gjykata Speciale u krijua për të hetuar akuzat e senatorit Dick Marty, të cilat janë cilësuar si produkt i një fushate dezinformimi rus, duke u mbështetur edhe në konfirmimin e gjeneralit Wesley Clark.