Në Dhomat e Specializuara të Kosovës në Hagë përfundoi procesi i paraqitjes së deklaratave përmbyllëse në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të akuzuar për vepra penale kundër administrimit të drejtësisë. Mbrojtja argumentoi se prokuroria nuk ka prova të mjaftueshme, duke theksuar se aktakuza mbështetet vetëm në dy takime të zhvilluara në lokalin “Route 66” dhe në tetë fjalë të thjeshta mes miqsh, pa asnjë dëshmi konkrete për përmbajtjen apo ndikimin e tyre. Avokatët theksuan mungesën e dëshmitarëve dhe provave që lidhen me këto takime, duke kërkuar lirimin e klientëve të tyre, ndërsa theksuan se nuk ka pasur asnjë veprim apo tentativë të veprës penale nga ana e të akuzuarve. Pas përfundimit të fjalëve përfundimtare, vendimi tani i takon gjykatësit Christopher Gosnell.