Ministrja në detyrë e Mjedisit dhe Planifikimit Hapësinor, Fitore Pacolli, njoftoi mbylljen e restorantit dhe hotelit “Liqeni i Dukagjinit” në Gjakovë, për shkak të rrezikut që objekti paraqet për ujin e pijshëm në zonën e mbrojtur të Liqenit të Radoniqit. Inspektorati i Mjedisit vendosi shiritat e mbylljes dhe i dha fund veprimtarisë së kundërligjshme të këtij objekti në këtë zonë. Ministrja paralajmëroi se institucionet do të vazhdojnë të veprojnë me vendosmëri për mbrojtjen e ujërave dhe zonave të mbrojtura në Kosovë, duke theksuar se uji i pijshëm është pasuri publike dhe mbrojtja e tij nuk pranon kompromis. Mbyllja erdhi pas një afati prej 10 ditësh që iu dha pronarëve për të ndërprerë veprimtarinë, ndërsa pronari deklaroi se nuk kishte pranuar ende vendim zyrtar dhe se puna vazhdonte.