Zyra Kombëtare e Auditimit ka zbuluar shkelje në Komunën e Vushtrrisë lidhur me menaxhimin e burimeve njerëzore, ku një mësimdhënëse me kontratë të përkohshme u transferua në një shkollë tjetër pa u zhvilluar konkurs apo procedurë e re rekrutimi. Fillimisht, ajo ishte angazhuar për të zëvendësuar një mësimdhënëse në pushim lehonie, por pas rikthimit të mësimdhënëses së rregullt, kontrata e saj duhej të përfundonte. Megjithatë, ajo vazhdoi punën në një pozitë tjetër, duke shkelur rregullat ligjore që kërkojnë që çdo angazhim i ri të bëhet përmes procedurës së re të rekrutimit. Auditori thekson se kjo praktikë cenon parimet e konkurrencës dhe transparencës në punësimin publik, dobëson kontrollin e brendshëm dhe rrit rrezikun e krijimit të praktikave jo të rregullta në angazhimin dhe transferimin e stafit.