Një gjykatë rajonale në Bremen të Gjermanisë ka dënuar kompaninë prodhuese të çokollatës Milka për praktikën e njohur si “shrinkflation”, ku peshë e produktit u ul nga 100 në 90 gramë pa ndryshuar dukshëm paketimin karakteristik. Vendimi erdhi pas padisë së ngritur nga organizata gjermane për mbrojtjen e konsumatorëve, e cila akuzoi kompaninë për mashtrim dhe shkelje të ligjit të konkurrencës, duke theksuar se konsumatorët u keqinformuan për ndryshimet në përmbajtje dhe çmim. Gjykata vuri në dukje se ruajtja e paketimit të njëjtë, ndërkohë që përmbajtja dhe çmimi ndryshojnë, krijon një perceptim të gabuar dhe kërkoi që çdo ndryshim të jetë i qartë dhe i dallueshëm për blerësit. Ndërsa kompania argumentoi se kishte informuar konsumatorët përmes kanaleve të saj zyrtare, vendimi ka shkaktuar debat të gjerë në Gjermani për transparencën në etiketimin e produkteve ushqimore.