Kryetari i Komisionit Qeveritar për Persona të Zhdukur, Kushtrim Gara, ka njoftuar se procesi i ekzaminimeve në një zonë të Zubin Potokut, ku dyshohet të jetë një varrezë masive, është ende në zhvillim e sipër. Ai theksoi se është shumë herët për të dhënë detaje të plota dhe se do të presin përfundimin e zhvarrimeve dhe ekzaminimeve mjeko-ligjore para se të bëjnë njoftime publike. Zona në fjalë ka qenë gjithmonë në fokus të institucioneve dhe prioritet i tyre mbetet respektimi i të drejtës së familjarëve për të mësuar fatin e të afërmve të zhdukur. Sipas informacioneve paraprake, dyshohet se në këtë vend mund të jenë mbetjet mortore të grupit të njohur si “intelektualët nga Mitrovica”, të zhdukur në prill të vitit 1999, por kjo ende duhet të konfirmohet.