Neuropsikiatri Sami Rexhepi ka komentuar vrasjen e rëndë në Dragash, ku viktima u godit pesë herë me thikë, duke e lidhur këtë akt me një mllef të grumbulluar gjatë një periudhe të gjatë. Ai thekson se kjo ngjarje është pasojë e humbjes së vlerave etike dhe morale në shoqëri, si dhe e mungesës së një sistemi efikas të drejtësisë dhe mekanizmave për parandalimin e konflikteve. Rexhepi nënvizon se vonesat në trajtimin e rasteve bëjnë që qytetarët të humbin besimin dhe të hezitojnë t’i drejtohen autoriteteve, duke rritur kështu rrezikun e tragjedive të parandalueshme. Ai ngriti alarmin për përshkallëzimin e dhunës në shoqëri, duke theksuar se konfliktet shpesh shpërthejnë për arsye të vogla, duke përmendur edhe raste absurde si vrasjet për një vend parkimi.