Prokuroria Speciale e Kosovës po përballet me vështirësi të mëdha në verifikimin e personave të akuzuar për krime lufte, për shkak të mungesës së bashkëpunimit juridik ndërkombëtar me Serbinë. Në aktakuzën për masakrën e Reçakut, njëri nga të akuzuarit kryesorë, Obrad Stevanovic, rezulton se ka vdekur tetë muaj para ngritjes së aktakuzës ndaj tij dhe 20 personave të tjerë. Gjykimi ndaj tyre pritet të mbahet në mungesë, pasi asnjëri nuk është i arritshëm për organet e drejtësisë. Ekspertët dhe avokatët paralajmërojnë se vazhdimi i këtyre praktikave mund të dëmtojë integritetin e proceseve gjyqësore, pasi sipas Kodit të Procedurës Penale, personat e vdekur nuk duhet të gjykohen, ndërsa mungesa e verifikimit zyrtar nga Serbia mbetet një pengesë kryesore.